രാജ്ഭവൻ സംഘടിപ്പിക്കുന്ന പരിപാടികളിൽ ദേശീയ ചിഹ്നവും ദേശീയ പതാകയും ഉറപ്പാക്കണമെന്ന് സംസ്ഥാന സർക്കാർ. ഗവർണർ രാജേന്ദ്ര ആർലേക്കറിന് നൽകിയ കത്തിലാണ് ഇക്കാര്യം വ്യക്തമാക്കുന്നത്. ഔദ്യോകിക പരിപാടികളിൽ ത്രിവർണ പതാക മാത്രമേ പാടുള്ളൂ എന്നും കത്തിൽ വ്യക്തമാക്കുന്നു. കാവി പതാകയേന്തിയ ഭാരതാംബയോടുള്ള എതിർപ്പിന്റെ കാരണവും സംസ്ഥാന സർക്കാർ കത്തിൽ വിശദീകരിക്കുന്നുണ്ട്.
ഔദ്യോഗികമായ പൊതുപരിപാടിയിൽ ത്രിവർണപതാക മാത്രമേ പാടുള്ളൂ എന്ന് സർക്കാർ ചൂണ്ടിക്കാട്ടുന്നു. മറ്റേത് ചിഹ്നവും ദേശീയ പതാകയെയും ദേശീയ ചിഹ്നത്തെയും അപമാനിക്കുന്നതിന് തുല്യമാണെന്നും കത്തിൽ വ്യക്തമാക്കുന്നുണ്ട്. രാജ്ഭവൻ സംഘടിപ്പിക്കുന്ന പരിപാടികളിൽ ദേശീയ ചിഹ്നവും ദേശീയ പതാകയും ഉറപ്പാക്കണമെന്നും ഇതുസംബന്ധിച്ച് ഗവർണർ രാജ്ഭവൻ ഉദ്യോഗസ്ഥർക്ക് ആവശ്യമായ നിർദേശം നൽകണമെന്നും സർക്കാർ അറിയിച്ചു.
1947-ലെ ഭരണഘടനാ അസംബ്ലിയിലെ ചർച്ചയെ ഉദ്ധരിച്ചാണ് കത്തിൽ സർക്കാരിന്റെ വിശദീകരണം. സാമുദായികമോ സാമൂഹികമോ ആയ പരിഗണനകൾ ദേശീയപതാക രൂപകല്പന ചെയ്തപ്പോൾ ഉണ്ടായിരുന്നില്ലെന്നും സംസ്ഥാന സർക്കാർ കത്തിൽ പറയുന്നു. വിഷയത്തിൽ എതിർപ്പറിയിച്ച് കഴിഞ്ഞ ദിവസം മന്ത്രി വി. ശിവൻകുട്ടിക്കെതിരേ ഗവർണർ കത്തയച്ചിരുന്നു. തുടർന്നാണ് സർക്കാർ ഗവർണർക്ക് കത്തുനൽകിയത്. ആർഎസ്എസ് പരിപാടികളിൽ ഉപയോഗിക്കുന്ന ഭാരതാംബ ചിത്രം രാജ്ഭവനിൽ ഉപയോഗിക്കുന്നതിലെ വിയോജിപ്പ് അറിയിച്ചുള്ളതാണ് കത്ത്.
